L´AMAGÜESTU NEL CRA SANTANA

Bones neños y neñes del CRA Santana. Esta selmana vamos celebrar l´amagüestu. De xuru que más d´un/a yá sabe qué ye lo que se fai nesta fiesta tradicional asturiana. Pa los/les qu´ inda nun lo saben o nun s´alcuerden tenemos equí a Taresa pa recordánoslo:

Cola llegada de la seronda empiecen a celebrase amagüestos per toda Asturies. Nos últimos años esta fiesta ta ganando puxu y ye raro'l colexu o la población que nun la entame.

 

¿Cómo se denomina?

 

Na zona central d’Asturies nómase amagüestu, mientres que pal occidente llámase magosto.

 

¿Cuándo se celebra?

 

En payares o finales d’ochobre.

 

¿En qué consiste?

 

Trátase d’una festividá na que se comen castañes y se bebe sidra dulce. Éstes ásense nun fueu mientres les persones festexen al so alrededor en comuña.

 

¿Por qué estos productos?

 

Son de temporada, esto ye, danse nesa época de la seronda. Hai que tener en cuenta que les castañes yeren un alimentu básicu pa los asturianos tiempu atrás hasta la so sustitución por otros productos. La sidra del duernu, mentes, ye’l resultante del mayáu de la mazana, entovía ensin fermentar.

 

¿Qué tien d’especial?

 

Ye una de les folixes con más tradición n'Asturies y, pese a que tien llugar nun periodu ampliu de tiempu, tamién tien rellación cola celebración de la llegada de la escuridá, esto ye l’iviernu pa los nuesos antepasaos, que namái distinguíen dos estaciones: l’iviernu y el branu.

 

Les persones amagostaben y delles castañes tirábanse al suelu pa los difuntos na Nueche d’Ánimes como parte de los nomaos banquetes funerarios. Esta xornada previa al 1 de payares ye cuando se creía que l'espíritu de los muertos acudía al mundu de los vivos. D’esta forma búscase congraciase con estos seres que vivíen na escuridá cola intención de consiguir la so proteición pal añu viniente.

 

¿Celébrase sólo n’Asturies?

 

Non, los amagüestos tienen tamién muncha fuercia en Llión y Galicia, cola so propia identidá, y existen celebraciones mui asemeyaes en delles zones peninsulares onde se da la castaña.

 

¿Qué ye dir a la gueta o al rebuscu?

 

Significa salir al monte a la busca de castañes. Ye dalgo bien prestosu que se pue facer por estes feches pa preparar l'amagüestu.

 

¿Cómo puedo participar nun amagüestu?

 

Na escuela o na to población de xuru qu'hai xente qu'entama amagüestos. Entérate y participa. Tamién pues xuntate con familiares y amigos y entamalo tu. ¡Namái fai faltar recoyer unes castañes pa acompañales con sidra del duernu!

Deprendimos unes cuantes pallabres sobre esta fiesta. Vamos trabayales con estos xuegos:

 Ruleta de pasapallabra.

Rompecabeces

Crucigrama

TRÍPTICU AMAGÜESTU Y HALLOWEEN

 

MARTES 27 D´OCHOBRE: Selmana de cambios.

 Neñes y neños,  

Esta selmana tocábenos celebrar l´amagüestu. 

Güei dibemos asar les castañes en Trones, pero vamos tener que faer otru cambiu más y posponelo pal martes 3 de payares. Asperemos tener suerte y poder celebralo esi día.  

Como güei nun vamos poder venos, voi dexar una pequeña tarea pa los escolinos de La Riela y de Trones que son los que tienen Llingua asturiana los martes.

EL RATU FERMÍN : Xera pa les neñes y los neños de primeru, segundu y terceru.

El ratón Fermín🐭 va de viaxe al planeta 🍁Seronda🍄, un viaxe máxicu con homes castaña🌰 y muyeres ablana🍂.

¿Prestóvos el vidiu? Aspero que sí.  Darréu de conocer la historia del ratu Fermín nel planeta Seronda, piensa a qué otros planetes pudo viaxar esti prestosu animalín. Imaxina qu´emprendes un viaxe con Fermín a otru planeta distintu al qu´apaez nesti cuentu y fai un dibuxu de los dos nesi nuevu llugar que descubrís. 

P´acabar, completa esti rompecabeces del mur y los sos collacios:

 

PERCORRIENDO ´L DÍA: Xera pa los rapazos y les rapaces de cuartu, quintu y sestu.

Toes y toos sabéis qu´esti domingu pasáu camudamos la hora. Con esti cambiu, escurez antes y dámonos cuenta, de sópitu, que la nueche se ta faciendo un pocoñin más llarga pasu ente pasu. 

Cola ayuda del diccionariu DALLA, y del traductor ESLEMA vais facer una redaición na que cuntéis cómo pasasteis el domingu y si se vos fizo más llargu ´l día que de costume (al medrar una hora). Habéis d´emplegar les pallabres: riscar / alborada, mañana, mediudía, tarde, atapecer / escurecer, medianueche y nueche. Alcordáivos del orde de les comides n´asturianu: almuerzu - xanta - merienda - cena.  Amás, podéis faer usu de los alverbios: ayeri, ceo, dacuando, poco, depués, enantes, entá, inda, entóncenes, enxamás, nunca, siempres, tovía, tarde, yá, mentanto...

Namái terminar la redaición podéis facer un dibuxu de lo que supón el cambiu d´hora pa vós. 

Xera 10: Repasu del tema 4. (Última Xera)

Hola xentiquina, ta al llegar el branu y Xipla trainos la última xera d´esti cursu 2019 / 2020. Ye ´l repasu del tema 4, que nos ofrez la editorial VTP.

Pa entrar nestes últimes actividaes de repasu y como fixestis pa les xeres 3, 4 y 7, vamos calcar nel siguiente enllaz:

http://www.vtpeditorial.com/Asturiano/llingua/

Una vegada que teáis na web de la editorial, va pidivos un usuariu y una contraseña: 

• Usuariu: cuarentena
• Contraseña: cuarentenallinguaasturiana

Darréu:

• Les escolines y los escolinos de primeru y segundu vais facer les 4 actividaes del tema 4 de Pitín 1
• Los neños y les neñes de terceru y cuartu fadréis les 11 actividaes del tema 4 d´Esguil 3
• Les rapaces y los rapazos de quintu y sestu vais facer les 8 actividaes del tema 4 de Tolina 5

Esta xera nun fai falta que la faigáis en papel, solo confirmáime que la fixestis mandándome un corréu o comentando la entrada del blog. 
Si vos xurde dalgún problema enfaciéndola, podéis escribime al chat de Teams o al corréu llinguaencasa@gmail.com.

🐝 Xipla quier despidise de vós con un rompecabeces y un crucigrama:

🐝 Y agora la mio despidida: 

• A los que coláis: Foi un arguyu davos clas, deséovos mui bona suerte nel institutu y que vos vaiga bien en tolo que vos propongáis. De xuru que sedrá asina.😉 
• A los que quedáis nel C.R.A.: Aspero volver a vevos otru añu más; pero nes escueles y cola normalidá que nun tuviemos esti cursu.😃 

Neñes y neños, camiento qu´en setiembre vuelvais a escuela coles piles cargaes, pa siguir deprendiendo y pa conocer mundu, tamién el vuesu mundu. Y alcordáivos siempres: Nesi mundu vuesu ta la llingua asturiana, nun la escaezáis.

Xera 9. El mio diccionariu de llingua asturiana. De la N a la Z

Hola neñes y neños. Esta selmana vamos siguir faciendo ´l nuesu diccionariu ilustráu de Llingua Asturiana.
Na xera 8 trabayamos hasta la lletra M. Nesta selmana vamos ver les lletres del abecedariu asturianu dende la N hasta la Z.

Darréu tenéis una llista de les lletres que formen la base del sistema escritu na nuesa llingua:

1.  Pa entamar vais dir buscando una pallabra por caúna de les 13 lletres que vos falten (N-Z). Pa ello podéis emplegar estos diccionarios:


Vocabulariu de Cangas del Narcea:
https://touspatous.es/biblioteca/lenguayetnografia/vocabulariu1999.pdf
DALLA
http://www.academiadelallingua.com/diccionariu/
DGLA (emplega les grafíes l.l y h.)
https://mas.lne.es/diccionario/


2. Llueu d´escoyer les pallabres, vais axuntar 13 fileres más a la  tabla que fixeréis na xera 8. Y vais dir rellenando les 4 columnes.  Facéilo como amuesa esti exemplu:

Atendéi:

• Les neñes y los neños de primeru, segundu y terceru nun tenéis que facer la tercer columna  de la tabla (Definición). 
• Esta selmana vamos facer les 13 lletres que nos falten, de la N a la Z.

Esti diccionariu d´esta xera 9 tenéis que lu facer en papel. Sacái una foto y apurríime les fotos al corréu llinguaencasa@gmail.com o al chat de Teams.

Xipla quier recordavos que tovía hai compañeros y compañeres con xeres ensin facer. Nel canal de llingua en Teams podéis comprobar si tenéis tarees pendientes nel rexistru d´actividaes.

¡Bona selmana xentiquina!

Xera 8. El mio diccionariu de llingua asturiana. De la A a la M

 Hola neñes y neños. Esta selmana Xipla traivos una tarea mui interesante. Vamos facer un diccionariu ilustráu de Llingua Asturiana propiu. Lo primero que nos fai falta ye alcordanos del abecedariu. ¿Daisvos cuenta de cuáles yeren les lletres del alfabetu asturianu?

Darréu tenéis una llista de les lletres que formen la base del sistema escritu na nuesa llingua:

1.  Pa entamar vais facer una portada. Nuna fueya escribíi en grande y con colores: el títulu El mio primer diccionariu de Llingua Asturiana; el vuesu nome ; el cursu y la vuesa escuela.
2. Llueu vais dir buscando una pallabra por cada lletra. Pa ello podéis emplegar estos diccionarios:


Vocabulariu de Cangas del Narcea:
https://touspatous.es/biblioteca/lenguayetnografia/vocabulariu1999.pdf
DALLA
http://www.academiadelallingua.com/diccionariu/
DGLA (emplega les grafíes l.l y h.)
https://mas.lne.es/diccionario/


3. Pa finar, dempués d´escoyer les pallabres, n´otra fueya vais facer una tabla con 4 columnes asemeyada a ésta (cola pallabra, la so definición n´asturianu y un dibuxu):

Atendéi:

• Les neñes y los neños de primeru, segundu y terceru nun tenéis que facer la tercer columna  de la tabla (Definición). 
• Esta selmana vamos facer 13 lletres, de la A a la M. La próxima selmana fadremos les demás.

🐝 Paula (de La Riela) alcordóse de Xipla el miércoles pasáu. Y ye qu´esi día, 20 de mayu, ye´l día mundial de les abeyes. Asina que pa celebralu, Xipla y yo ficímosvos dos xuegos voluntarios pa que vos entretengáis, cuando finéis la xera d´esta selmana. Gracies Paula 😉

Rompecabeces: Les collacies de Xipla

Ruleta de pasapallabra: Les plantes y los vexetales

Esti diccionariu d´esta xera 8 tenéis que lu facer en papel. Sacái una foto y apurríime les fotos al corréu llinguaencasa@gmail.com o al chat de Teams.

Xipla quier recordavos que tovía hai compañeros y compañeres con xeres ensin facer. Nel canal de llingua en Teams podéis comprobar si tenéis tarees pendientes nel rexistru d´actividaes.

Que vos preste la xera reciella.

¡Bona selmana!

Xera 7: Repasu del tema 3

🐝 Hola xentiquina, esta selmana vamos siguir trabayando  coles actividaes de repasu del tema 3 que nos ofrez la editorial VTP.

Pa ello y como fixestis pa les xeres 3 y 4, vamos calcar nel siguiente enllaz:

http://www.vtpeditorial.com/Asturiano/llingua/

Una vegada que teáis na web de la editorial, va pidivos un usuariu y una contraseña: 

• Usuariu: cuarentena
• Contraseña: cuarentenallinguaasturiana

Darréu:

• Les escolines y los escolinos de primeru y segundu vais facer les 6 actividaes del tema 3 de Pitín 1
• Los neños y les neñes de terceru y cuartu fadréis les 12 actividaes del tema 3 d´Esguil 3
• Les rapaces y los rapazos de quintu y sestu vais facer les 8 actividaes del tema 3 de Tolina 5

Esta xera nun fai falta que la faigáis en papel, solo confirmáime que la fixestis mandándome un corréu o comentando la entrada del blog. 
Si vos xurde dalgún problema enfaciéndola, podéis escribime al chat de Teams o al corréu llinguaencasa@gmail.com .

Munchu ánimu: ¡Yá queda menos!

Xera 6: Actividá asturfísica

🐝 Esta selmana vamos facer una xera conxunta d´ Educación Física y Llingua asturiana

Vamos tener dos tarees:

1. XIMIÉLGATE CON SUPERLLINGUA

 Dende Reciella Families pol asturianu estrenen una canal especial: Superllingua vien perbién acompañáu pa facenos más llevaderu y dinámicu'l tiempu en casa. Esta selmana presenten un vidiu con unos conseyos pa caltener el cuerpu y la mente sano 

¿Animáisvos a sacar l'héroe/heroína que lleváis dientro? 

Namás tenéis qu´imitar los exercicios que veis nel vidiu que vos apaez darréu:

2. EL CASCAYU

_Lo primero que vais faer ye crear un xuegu que de xuru conocéis bien:

¡¡¡EL CASCAYU!!!!

Cascayu (DALLA): Xuegu que 

consiste en llanzar una piedra o

chapla a unos cuadros pintaos en

suelu y en saltar per ellos a la 

pata coxa moviendo la piedra.

Esti ye'l nuesu cascayu pantasma y lo que vos toca facer a vós ye inventar un cascayu nuevu y mandanos semeya, podéis faer cualquier diseñu siempres que sía un cascayu, ye dicir que tenga 10 caxellos. 

Como yá podéis salir, podéis dibuxar el cascayu na cai. Si nun podéis, tenéis que faelo nun foliu y tenéis qu'unviánoslu. Tamién pue ser una foto vuesa xugando.

_Lo siguiente que tenéis que faer ye xugar. 

Pa xugar:

1. Dibuxamos nel suelu los cuadros que sían abondo grandes pa que quepa un pie. Podemos usar tices o cualquier cosa que pinte nel suelu.
2. Buscamos una piedra nin mui grande, nin mui pequena.
3. Sortiamos quién entama a xugar.
4. El xugador llanza la piedra al cuadro númberu 1, darréu va saltar a la pata coxa al cuadro númberu 2 y d´ ésti al númberu 3.
5. Llueu descansa nos cuadros númberu 4 y 5, posando un pie en cada cuadru, asina hasta'l cuadru 10 (nel nuesu casacayu ye'l teyáu del castiellu) onde d'un saltu va xirar dando una vuelta y va volver de la mesma manera hasta'l cuadru númberu 2. Ellí calteniendo l'equilibriu a la pata coxa va tener que recoyer la piedra y saltar fuera del cascayu ensin pisar el cuadru 1.
6. Cuando faiga correutamente'l percorríu, volverá llanzar la piedra al cuadru númberu 2 y asina sucesivamente.

Si la piedra nun cai dientro´l cuadru, o se pierde l'equilibriu, o se pisa col pie dalguna raya; el xugador pierde y pasa al siguiente xugador o xugadora.

Cuando se llanza hasta'l númberu 10, si se quier siguir xugando, volvemos empezar pero en sentíu contrariu, esto ye, entamamos nel númberu 10 y acabamos nel númberu 1.

🐝 Tolos alumnos tenéis qu´unvianos foto del vuesu cascayu:  yá seya fechu en suelu o dibuxáu nun foliu. Tamién pue ser una foto vuesa xugando.

🐝 Amás, los neños de cuartu, quintu y sestu: tenéis que realizar un pequeñu trabayu d'investigación:

• Tenéis de buscar qué son los xuegos populares asturianos y desplicanos unu d'ellos. 
• Recordái qu´el trabayu tien que tener un títulu, bona lletra, conteníu que pueda entendese y dibuxu.

Mandáinos a Marián o a min les fotos del cascayu y del trabayu. Podéis facelo escribiendo:

• A los correos  llinguaencasa@gmail.com o efmariam2020@gmail.com 
• Nos canales de Llingua Asturiana o d´ Educación Física
• Nel  chat de Teams.

¡Vémonos pronto xentiquina! 😉 

Xera 5: Cuntando cuentos

¡Bones reciella! 

Esta selmana tráigovos una historia y un cantar:

1. LA PRIMAVERA ZARRADA

Esti cuentu de  l´ Ablanera ye una historia asemeyada a la vuesa. Fala d´un llugar (la viesca) onde toos tuvieron que se quedar en casa por aciu de dos seres: "Catas" y "Trofe" ¿A qué vos suena?. Los habitantes pasaron  una llarga y murnia primavera. Pero al cabu, cola llegada´l branu, los xigantes malos fuxeron y la xente pudo salir de casa.

Dende ayeri les neñes y los neños yá podéis salir a caleyar con cudiáu de siguir unes normes. Ye bono procurar de nun s´axuntar colos collacios pa evitar el contaxu pol nuesu xigante particular. Entá nun acompaña ´l tiempu, pero van venir díes soleyeros nos que vos preste dir a pasear y nun tar siempres metíos en casa. 

Actividá 1 (Primeru, segundu y terceru de primaria)

• ¿Qué-y pasó a l´ablanera esta primavera?
• Fai un dibuxu tuyu ensaliendo de casa dempués de la cuarentena. Dexuru que más d´una vegada  imaxinasti cómo sedría.
• Camienta: ¿Cuáles son les primeres persones que querríes ver y abrazar cuando pase esti encierru?

Actividá 1 (Cuartu, quintu y sestu de primaria)

• ¿En qué coses s´asemeyen (se paecen) la historia de l´ablanera y la tuya?
• ¿Qué simbolicen Catas y Trofe? 
• ¿Y qué representa´l sol?
• Describi too aquello que nagües por facer cuando volvamos a la normalidá.

2. BAMBI

Tenemos otru amiguín que vive nun mundu máxicu. Ye d´un llugar nel que por suerte nun tien que guardar confinamientu. Y ta pasándolo perbién pela viesca. ¿Imaxinaisvos quién pue ser?

Actividá 2 (Primeru, segundu y terceru de primaria)

• ¿De qué animales fala ´l cantar?
• Fai esti puzle de Bambi:

Actividá 2 (Cuartu, quintu y sestu de primaria)

• Copia nuna fueya la lletra´l cantar.
• Arrodia de mariellu les apostrofaciones qu´ alcuentres.
• Sorraya d´azul los sustantivos y de colloráu los verbos.
• Fai esti pasapallabra d´animales de la viesca:

Estes 2 actividaes d´esta xera 5 tenéis que les facer en papel, saca-yos una foto y apurrime les fotos al corréu llinguaencasa@gmail.com o al chat de Teams.

Xipla quier recordavos que tovía hai compañeros y compañeres con xeres ensin facer. Nel canal de llingua en Teams podéis comprobar si vos falten xeres nel rexistru d´actividaes 

Entamamos una selmana prestosa, onde la reciella con procuru y responsabilidá yá pue asomar pela cai. Ye perimportante que sigamos les indicaciones sanitaries. Nun mos escaezamos del papel tan importante que tenemos nesta llucha.

¡Bona selmana xentiquina!

Actividá Voluntaria: ¡Lleer presta asgaya!

Mui bones rapacinos y rapacines: 

Esta selmana nun vais tener nenguna tarea de llingua, namás qu´una llectura voluntaria. Ello ye pa da-yos una selmana más de plazu a los neños y neñes qu´ entá tienen xeres ensin facer o ensin confirmar. 

Con motivu del día internacional del llibru que se va celebrar el próximu xueves día 23 d´abril, Xipla quier ufiertavos 4 llibros perprestosos que dende la editorial Impronta ponen al vuesu algame pa pasar lo meyor posible esti encierru. Escoyéi el que vos pruya o más vos preste y disfrutái de la llectura.

Aína y despacio

https://issuu.com/carlosgonzalezespina/docs/ai_na_y_despacio_web

Delles coses hai que les facer poco a poco, despacino, pali que pali. Pero otres veces val más entainar tolo que seyamos a ello. D'eso ye de lo que trata esti llibru, la guía primaria pa salir mundu alantre sabiendo en cada casu cuándo hai qu'espabilar y cuándo hai qu'aposentar.

Como en casa en nengún llau

https://issuu.com/carlosgonzalezespina/docs/como_en_casa_en_nengu_n_llau

¿A quién nun-y gusta viaxar, conocer xente, ver otros pueblos y ciudaes, vivir aventures? Pero cuánto nos presta llueu tornar pa casa, al calor del llar, el verdaderu centru del mundu, onde tan a gustu tamos y tanto nos afayamos. Dícenlo tolos que viven nesti llibru y con razón: como en casa en nengún llau.

Ensin orde nin conciertu

https://issuu.com/impronta/docs/ensin_orde_ni_conciertu_web

Hai persones que son fanátiques del orde. Esi nun ye'l casu de la protagonista d'esti cuentu. Ella ye más de dexar les coses tranquiles. Nun-y gusta apurales nin estresales. Prefier da-yos llibertá y espaciu pa qu'atopen el so sitiu natural elles sole.

Pallabres pa Martín

https://issuu.com/impronta/docs/pallabres_pa_marti_n_web

Como güei ta lloviendo, el pequeño Martín nun puede salir a pasiar. El pá entós entretiénlu contándo-y les histories de cuando yera neñu, allá en Paraguay, un país de viesques grandísimes onde viven l'armadillu, el cuati, l'osu formigueru, el puma, el tucán, el páxaru campana, ... Y onde hai munchos ríos pa xugar. Ellí saben toles pallabres guaraníes coles que nomen a los animales, les coses y los xuegos. Saben tamién esguilar a los árboles más altos de la viesca, y saltar ente les piedres del ríu pa garrar el pexe d'oru que vive nel fondu de los pielgos.

Y por si tenéis gana lleer más, alcuérdovos que dende Pintar-Pintar Editorial cuntáis tamién con un bon númberu de llibros n´asturianu y en castellán col que vos poder entretener estos díes:

http://www.digital.pintar-pintar.com/bookcase/combj

Xera 4: Repasu del tema 2

  🐝Dempués d´estes "vacaciones" de Selmana Santa vamos siguir coles actividaes de repasu del tema 2.

Pa ello y como fixestis pa la xera 3, vamos calcar nel siguiente enllaz:

http://www.vtpeditorial.com/Asturiano/llingua/

Una vegada que teáis na web de VTP editorial, va pidivos un usuariu y una contraseña: 

• Usuariu: cuarentena
• Contraseña: cuarentenallinguaasturiana

Darréu:

• Les escolines y los escolinos de primeru y segundu vais facer les 5 actividaes del tema 2 de Pitín 1
• Los neños y les neñes de terceru y cuartu fadréis les 11 actividaes del tema 2 d´Esguil 3
• Les rapaces y los rapazos de quintu y sestu vais facer les 12 actividaes del tema 2 de Tolina 5

Esta xera, al igual que la xera 3, nun fai falta que la faigáis en papel, solo confirmáime que la fixestis mandándome un corréu o comentando la entrada del blog. 
Si vos xurde dalgún problema enfaciéndola, podéis dirixivos a min pel corréu llinguaencasa@gmail.com.

 Aspero que tengáis bona selmana y mándovos munchu ánimu.

Xera 3: Repasu del tema 1

     🐝 Nesta tercer selmana vamos entamar con actividaes de repasu del tema 1 que viemos en clas.

Pa ello vamos calcar nel siguiente enllaz:

http://www.vtpeditorial.com/Asturiano/llingua/

Una vegada que teas na web de VTP editorial, va pidite un usuariu y una contraseña. 

• Usuariu: cuarentena
• Contraseña: cuarentenallinguaasturiana

Darréu:

• Les escolines y los escolinos de primeru y segundu vais facer les 6 actividaes del tema 1 de Pitín 1
• Los neños y les neñes de terceru y cuartu fadréis les 10 actividaes del tema 1 d´Esguil 3
• Les rapaces y los rapazos de quintu y sestu vais facer les 9 actividaes del tema 1 de Tolina 5

Esta xera 3 nun fai falta que la faigáis en papel, solo tenéis que dicime que la fixestis. 

Xipla quier recordavos que podéis dir pasándome semeya de les xeres 1 y 2 de les otres selmanes, como yá fixo dalgún de los vuesos compañeros. 
Con sacar una foto al papel onde les tengáis feches ye abondo. Llueu mandáime les fotos al corréu llinguaencasa@gmail.com.

 ¡Bona selmana xentiquina!

Receta n´asturianu

En Reciella-Families pol asturianu, escolingaron un videu onde Llume y Arián ficieron un platu n´asturianu.

Xipla y yo pidímos-yos permisu pa xubivos equí el trabayu que ficieron a mou d´exemplu de la Xera 1 de la selmana pasada. Y dende Reciella tán encantaos de que vos lo apurra. Asina qu´equí tenéis:

Llume y Arián

Tarta de la güela

Confirmación d´actividaes

  Pa saber si vais faciendo les xeres, déxovos la cuenta de corréu llectrónicu:

llinguaencasa@gmail.com

Dende ehí podéis faceme entrugues, apurrime fotos de les actividaes o comunicame que les fixestis, o si tuviestis dalgún problema.

Actividá voluntaria: Llectura n´asturianu

🐝 Dende Pintar-Pintar Editorial  ponen a la vuesa disposición un bon númberu d'álbumes infantiles ilustraos.

Pa viaxar al mundu los llibros namás que tienes que calcar nel enllaz que t´apaez darréu:

http://www.digital.pintar-pintar.com/bookcase/combj

Aspero qu'esfrutéis cola so llectura.

Xera 2 b: La otra tabla

🐝 Tarea d´esta selmana pa los neños de cuartu, quintu y sestu de primaria:

De xuru que yá eches un pocoñín de menos dir a la escuela. Vamos alcordanos d´ello con esti cantar de Nacho Fonseca y el grupu Xentiquina:

La otra tabla

Yá ves que la xera d´esta selmana va dir de tables. Asina que garra una fueya📃,un llapiceru ✏ y una regla📏 , qu´entamamos: 

• A lo primero, vas facer una tabla con dos columnes. Nuna delles pondrás coses poles que te presta dir al colexu y na otra columna coses poles que te da galbana dir. (Fai la tabla curiosa, con xeitu, que pa eso ye la regla👀)
• Pa finar, fadrás otra tabla na que vas poner una columna colos sustantivos y otra colos axetivos qu´apaezan na lletra del cantar,"La Primavera", que tenéis na anterior entrada del blog.

Xera 2 a: La Primavera

🐝 Xera d´esta selmana pa los neños de primeru, segundu y terceru de primaria: 

¿Diéstisvos cuenta qu ´entamó la primavera?

Xipla va a tar percontenta.
¡Agora sí que va a tener flores asgaya!

Vamos recibir esta estación con un cantar del grupu Xentiquina:

La Primavera

• Nel cantar apaecen los nomes de tres páxaros ¿Cúalos son? 
• Apúntalos nuna fueya y fai un dibuxu de caún d´ellos. 

• Pa finar, atopa nesta sopa lletres más nomes de paxarinos y d´otres aves de mayor tamañu n´asturianu:

Berta Piñán - Una casa.

Güei, día 21 de marzu, celébrase´l día mundial de la poesía. Apúrrovos esti poema de Berta Piñán, escritora n´asturianu y Conseyera de Cultura, Política Llingüística y Turísmu. 

Aspero que vos preste. 

UNA CASA

Llevantar una casa que seya como un árbol, 

como Dafne crecer peles sos cañes, 

sentir las estaciones, la fueya nuevo después de la invernera, 

les frutes primeres del branu. 

Una casa que seya como un árbol,

qu'aguante los rellampos, 

qu'escample la pedrisca, 

qu'espante lloñe la ventolera xélido del tiempu.

Llevantar una casa que seya como un ríu, 

navegable y llixera,

 mudable, pasaxera, 

beber de les sos fontes, parame peles poces, correr colos regatos. 

Una casa que seya como un ríu, 

qu'arrastre la derrota,

qu'arranque'l dolor de les sequeres

 y lu lleve, pel rabión, agües abaxo.

Llevantar una casa que seya como un mundu,

 andar les xeografíes de pasiellos,

 cordales d'escaleres,

 les ventanes abiertes, les pontes, los caminos. 

Sentame na antoxana

 a ver andar la vida, 

una amiga, un país, una llingua,

 saludar un instante cuando pasen.

Llevantar una casa que ponga'l nuestru nome,

 les señes qu'un día enquivocamos,

una palabra, un rostru, la memoria d'aquello que quiximos,

y asina llevantar una casa
namás que por si vuelves.

Les estaciones del añu

Güei, día 20 de marzu, entama la primavera.

Equí vos dexo una imaxe de Les Estaciones del Añu facilitada pol Serviciu de Normalización Ḷḷingüística del Conceyu Cangas.

Un saludu candial y bon aniciu d´esta estación del añu.

Xera 1: Receta n´asturianu

  Esta selmana Xipla tien gana comer un platu típicu asturianu, pero nun sabe de nengunu. Asina que voi pidite que faigas un trabayu de recoyida d´información pa escribir la nuesa primer receta n´asturianu.

1. Piensa nun platu tradicional asturianu que te preste.
2. Garra una fueya y un llapiceru y entrugua-y a la to familia polos ingredientes d´esi platu. Ye bona ocasión pa face-ys una llamadina a los tos buelos. Estos díes hai que procurar nun salir de casa y va presta-ys tamién que t´alcuerdes d´ellos. Amás, tienen que saber los ingredientes d´esi platu meyor que naide.
3. Agora desplica cómo se cocina ´l platu emplegando si faen falta les siguientes palabres: De primeres, pa entamar, demientres, llueu, entós, dempués, darréu, al tiempu, pa finar...
4. Y pa dexar bien guapa la receta fai un dibuxu del platu.

Un vegada que terminéis la receta, podéis animavos a facer el platu. De xuru que vos sal muito bien.

 👀 Los escolinos de primeru y segundu namás tenéis que facer  los apartaos 1, 2 y 4.

¡Entamamos a trabayar!

Nestes selmanes que nun vamos poder dir a escuela, la clas de llingua vamos siguila equí.  

Cada selmana la abeya Xipla va echame un gabitu pa xubivos xeres a esti blog.

Si faciendo les actividaes, nun entendéis dalguna palabra, podéis emplegar el Diccionariu de la Academia de la Llingua Asturiana (DALLA) col que trabayamos en clas:

http://www.academiadelallingua.com/diccionariu/

Pa cualesquier dulda, podéis facer comentarios nes entraes o escribime a la mio cuenta de corréu llectrónicu: 
llinguaencasa@gmail.com

¿Qué vos paez si entamamos?