SYMBALOO CRA SANTANA

 

La negación n´asturianu

NUN y NON

La negación n'asturianu

.

N'asturianu usamos dos formes pa facer la negación:

NUN y NON.

¿Cómo? Ye perfácil…

NUN

Emplégase cuando la negación precede al verbu conxugáu o a un pronome personal átonu siquíu d’un verbu conxugáu. Por exemplu:

Nun salgáis si orbaya. 

Suspendió porque nun estudió.

Nun vos manquéis  

Entraron y nun s’ atrevieron a mercalo

Nun-yos tien l'almuerzu fechu.

NON

Emplégase nel restu de los casos, como pa la rempuesta curtia a una entruga, enantes d’una pausa o delantre d’elementos non verbales. Por exemplu:

¿Fuisti a Cangas? Non. 

¿Quies un cachín de quesu? Non, gracies          

¿Yera asina? Non, nun yera asina   

La non violencia y la non tolerancia

Agora vamos a prauticar un pocoñín lo deprendío:

Xera - Cuentiquinos en videu - Del martes 12 al xueves 14 de xineru del 2021

Bones, neñes y neños. Pasanon les navidaes y cuento que vos traxeron muitos regalos los Reis. Dende llueu tar en familia ye´l meyor de tolos regalos que podéis tener. 

Seique tamos teniendo un entamu del segundu trimestre non mui cenciellu pa vós. Y ello ye pol aciu de les condiciones meteorolóxiques; los argayos o fanas; y sobremanera pol avance de los contaxos de COVID. 

N´especial a los escolinos y les escolines de Trones y a les sos families queremos deseavos salú. Y eso-yos pidimos a los Magos d´Oriente, qu´entá nun andarán mui lloñe pa oyinos: Qu´esta pandemia pase y que teamos toos y toes pa velo con salú, que con eso abasta. Nun pidimos más.

Rapacinos/es, dempués de les fiestes navidiegues, Xipla atopóvos dos cuentiquinos que de xuru vos van prestar.

DEXANDO GÜELGA

Xera pa les neñes y neños de 1u , 2u y 3u d' Educación Primaria. 

"Menudu elementu"

1. Escuchái el cuentu y facéi un dibuxu de Güelguines y de la so familia: El so pá, la so ma  y los sos hermaninos.

🐝Alcordáivos, los puntinos enrriba la Ü llámense diéresis y faen que pronunciemos la U y digamos "güe" y non "gue". La diéresis apaez en pallabres asturianes como güei, güeyos o güela.🐝

2. Huella, n´asturianu ye güelga. ¿Por qué vos paez que-y pusieron de nome Güelguines al pequeñu dinosauriu? 

3. Nel dibuxu d´enantes, amesta una o varies güelgues de les pisaes de los dinosaurios.

4. En videu apaecen los siguientes nomes d´animales: curuxa, ballenes, cascoxinos, tortuga, braquiosauriu, cocodrilu, saurópodu, llargatu, dinosauriu. Si hai dalgunu que nun conozas, búscalu per internet. Piensa cómo se veríen les güelgues de toos estos animales nel sable (arena). Cómo ves toos ellos tienen una güelga distinta.

5. Garrái otra fueya na que pongáis por títulu LA MIO GÜELGA y cola ayuda de daquién, calcái la forma´l vuesu pie. Podéis descalzavos y faelo enrriba una siella o d´un tayuelu.

6. Pa finar, sacái foto a los dos dibuxos y xubi-ylos a TEAMS > CANAL D´ASTURIANU > ARCHIVOS > CARGAR

L´INVENTU´L SIEGLU

 -Xera pa les rapaces y los rapazos de 4u , 5u y 6u d' Educación Primaria. 

"De recuerdu, un dinosauriu"

PA ENTAMAR: ABRI MICROSOFT WORD NEL TO ORDENADOR, COPIA LES SIGUIENTES ENTRUGUES NEL DOCUMENTU Y RESPUENDI:

1. Escuchái el cuentu de Ramón, ¿Pensáis que taba llocu? ¿Creéis que los y les grandes inventores de la historia enxamás s´enquivocaron?

2.  Desplicái ´l significáu del siguiente refrán: "Quien nun se decide nun pasa la mar"

3. Emplegando´l diccionariu DALLA y el traductor ESLEMA, Pensái que tuvierais una máquina del tiempu que furrulara de verdá. Llueu facéi una redaición sobre un viaxe nel tiempu. Podéis ayudavos de les siguientes entrugues ¿A ónde diríeis? ¿Qué o a quién atoparíeis? ¿Trairíeis dalgo del pasáu o del futuru? ¿Tendríeis problemes pa tornar de vuelta?...

4. Facéi por discurrir cúal sedría pa vos l´inventu´l sieglu y desplicái ´l porqué:

PA FINAR: GUARDA´L DOCUMENTU COL TO NOME SIGUÍO DE LA PALLABRA -INVENTA- Y AXÚNTALO EN TEAMS > CANAL D´ASTURIANU > ARCHIVOS > CARGAR

L´AMAGÜESTU NEL CRA SANTANA

Bones neños y neñes del CRA Santana. Esta selmana vamos celebrar l´amagüestu. De xuru que más d´un/a yá sabe qué ye lo que se fai nesta fiesta tradicional asturiana. Pa los/les qu´ inda nun lo saben o nun s´alcuerden tenemos equí a Taresa pa recordánoslo:

Cola llegada de la seronda empiecen a celebrase amagüestos per toda Asturies. Nos últimos años esta fiesta ta ganando puxu y ye raro'l colexu o la población que nun la entame.

 

¿Cómo se denomina?

 

Na zona central d’Asturies nómase amagüestu, mientres que pal occidente llámase magosto.

 

¿Cuándo se celebra?

 

En payares o finales d’ochobre.

 

¿En qué consiste?

 

Trátase d’una festividá na que se comen castañes y se bebe sidra dulce. Éstes ásense nun fueu mientres les persones festexen al so alrededor en comuña.

 

¿Por qué estos productos?

 

Son de temporada, esto ye, danse nesa época de la seronda. Hai que tener en cuenta que les castañes yeren un alimentu básicu pa los asturianos tiempu atrás hasta la so sustitución por otros productos. La sidra del duernu, mentes, ye’l resultante del mayáu de la mazana, entovía ensin fermentar.

 

¿Qué tien d’especial?

 

Ye una de les folixes con más tradición n'Asturies y, pese a que tien llugar nun periodu ampliu de tiempu, tamién tien rellación cola celebración de la llegada de la escuridá, esto ye l’iviernu pa los nuesos antepasaos, que namái distinguíen dos estaciones: l’iviernu y el branu.

 

Les persones amagostaben y delles castañes tirábanse al suelu pa los difuntos na Nueche d’Ánimes como parte de los nomaos banquetes funerarios. Esta xornada previa al 1 de payares ye cuando se creía que l'espíritu de los muertos acudía al mundu de los vivos. D’esta forma búscase congraciase con estos seres que vivíen na escuridá cola intención de consiguir la so proteición pal añu viniente.

 

¿Celébrase sólo n’Asturies?

 

Non, los amagüestos tienen tamién muncha fuercia en Llión y Galicia, cola so propia identidá, y existen celebraciones mui asemeyaes en delles zones peninsulares onde se da la castaña.

 

¿Qué ye dir a la gueta o al rebuscu?

 

Significa salir al monte a la busca de castañes. Ye dalgo bien prestosu que se pue facer por estes feches pa preparar l'amagüestu.

 

¿Cómo puedo participar nun amagüestu?

 

Na escuela o na to población de xuru qu'hai xente qu'entama amagüestos. Entérate y participa. Tamién pues xuntate con familiares y amigos y entamalo tu. ¡Namái fai faltar recoyer unes castañes pa acompañales con sidra del duernu!

Deprendimos unes cuantes pallabres sobre esta fiesta. Vamos trabayales con estos xuegos:

 Ruleta de pasapallabra.

Rompecabeces

Crucigrama

TRÍPTICU AMAGÜESTU Y HALLOWEEN

 

MARTES 27 D´OCHOBRE: Selmana de cambios.

 Neñes y neños,  

Esta selmana tocábenos celebrar l´amagüestu. 

Güei dibemos asar les castañes en Trones, pero vamos tener que faer otru cambiu más y posponelo pal martes 3 de payares. Asperemos tener suerte y poder celebralo esi día.  

Como güei nun vamos poder venos, voi dexar una pequeña tarea pa los escolinos de La Riela y de Trones que son los que tienen Llingua asturiana los martes.

EL RATU FERMÍN : Xera pa les neñes y los neños de primeru, segundu y terceru.

El ratón Fermín🐭 va de viaxe al planeta 🍁Seronda🍄, un viaxe máxicu con homes castaña🌰 y muyeres ablana🍂.

¿Prestóvos el vidiu? Aspero que sí.  Darréu de conocer la historia del ratu Fermín nel planeta Seronda, piensa a qué otros planetes pudo viaxar esti prestosu animalín. Imaxina qu´emprendes un viaxe con Fermín a otru planeta distintu al qu´apaez nesti cuentu y fai un dibuxu de los dos nesi nuevu llugar que descubrís. 

P´acabar, completa esti rompecabeces del mur y los sos collacios:

 

PERCORRIENDO ´L DÍA: Xera pa los rapazos y les rapaces de cuartu, quintu y sestu.

Toes y toos sabéis qu´esti domingu pasáu camudamos la hora. Con esti cambiu, escurez antes y dámonos cuenta, de sópitu, que la nueche se ta faciendo un pocoñin más llarga pasu ente pasu. 

Cola ayuda del diccionariu DALLA, y del traductor ESLEMA vais facer una redaición na que cuntéis cómo pasasteis el domingu y si se vos fizo más llargu ´l día que de costume (al medrar una hora). Habéis d´emplegar les pallabres: riscar / alborada, mañana, mediudía, tarde, atapecer / escurecer, medianueche y nueche. Alcordáivos del orde de les comides n´asturianu: almuerzu - xanta - merienda - cena.  Amás, podéis faer usu de los alverbios: ayeri, ceo, dacuando, poco, depués, enantes, entá, inda, entóncenes, enxamás, nunca, siempres, tovía, tarde, yá, mentanto...

Namái terminar la redaición podéis facer un dibuxu de lo que supón el cambiu d´hora pa vós. 

Xera 10: Repasu del tema 4. (Última Xera)

Hola xentiquina, ta al llegar el branu y Xipla trainos la última xera d´esti cursu 2019 / 2020. Ye ´l repasu del tema 4, que nos ofrez la editorial VTP.

Pa entrar nestes últimes actividaes de repasu y como fixestis pa les xeres 3, 4 y 7, vamos calcar nel siguiente enllaz:

http://www.vtpeditorial.com/Asturiano/llingua/

Una vegada que teáis na web de la editorial, va pidivos un usuariu y una contraseña: 

• Usuariu: cuarentena
• Contraseña: cuarentenallinguaasturiana

Darréu:

• Les escolines y los escolinos de primeru y segundu vais facer les 4 actividaes del tema 4 de Pitín 1
• Los neños y les neñes de terceru y cuartu fadréis les 11 actividaes del tema 4 d´Esguil 3
• Les rapaces y los rapazos de quintu y sestu vais facer les 8 actividaes del tema 4 de Tolina 5

Esta xera nun fai falta que la faigáis en papel, solo confirmáime que la fixestis mandándome un corréu o comentando la entrada del blog. 
Si vos xurde dalgún problema enfaciéndola, podéis escribime al chat de Teams o al corréu llinguaencasa@gmail.com.

🐝 Xipla quier despidise de vós con un rompecabeces y un crucigrama:

🐝 Y agora la mio despidida: 

• A los que coláis: Foi un arguyu davos clas, deséovos mui bona suerte nel institutu y que vos vaiga bien en tolo que vos propongáis. De xuru que sedrá asina.😉 
• A los que quedáis nel C.R.A.: Aspero volver a vevos otru añu más; pero nes escueles y cola normalidá que nun tuviemos esti cursu.😃 

Neñes y neños, camiento qu´en setiembre vuelvais a escuela coles piles cargaes, pa siguir deprendiendo y pa conocer mundu, tamién el vuesu mundu. Y alcordáivos siempres: Nesi mundu vuesu ta la llingua asturiana, nun la escaezáis.